Tjevera mo kavaka Mukuru

Ouzandona uvari, kemwe kozombura ndano na karwe kozombura hambombari wa ri oupikapika tjinene.  Aruhe owo aau hiti moumba nu ovanene vawo aave tjiwa kutja tji pa tjitwa ouhahu poo tji pa zengi otjiṋa mokahuro kawo okutja mape ya owo mbwa tjiti.

Ina younatje wa zuva kutja pe nomuhonge mokahuro u nondoṋeno mokukotora ovanatje mondjira, nu eye otja ningira ingwi omuhonge okuhungira ku novazandona mbo. Omuhonge wa yakura omatokero nga posi a rakiza kutja ma vatere indu tji ma hakaene nozonḓiṱona nḓo koumweumwe. Ina wa hinda omuatje ngo omuangu muhuka omunene rutenga, kutja indi erumbi ri kongorere ometaha.

Omuhonge ngwa ri omurumendu wombao wa haamisa okazandona inga neke pura ongarate noukukutu: 

“Mo tjiwa kutja Mukuru u ri pi muzandona?”

Kamua Smiley Kaura

Otjinyo tjokazandona tja paturuka, posi ake ha ziri; ake haama mbo nomeho ngu maye takauka motjiuru nozondjeo nḓe riyara pehi.

Okutja omuhonge a yarukire po nepuriro re aa pamisire ko eraka aayo ma wenene.

“Mukuru u ri pi?!” 

Rukwao okazandona kake kondjere okuzira epuriro ndi. 

Omuhonge wa yerera ko eraka re na taka omunwe momurungu wokazandona na pura motjimboro , “MUKURU U RI PI?!”

Okazandona ka ura kotjinyo nake purukuta otjorutjeno okuza mondjuwo yomuhonge, ake tupuka otjikara tjomasa konganda nake keripatera motjiṱiziro tjozombanda, aka tono omuvero kongotwe yako.

Erumbi re tji re mu vaza motjiṱiziro tjozombanda ari pura,”Pa kaenda tjike?”

Omuangu mokati kongondjero yokusuvana (otjomundu ngwa uruma nu wa utuka nomasa a ziri),

“Tu ri moumba OUNENE otjikando tji!”

Erumbi ari handuka kaṱiṱi nari riṱunine okupuratena komuangu nai ngwe mu ṋangere popezu okumuraera meraka rokehi.

“Mukuru wa zengi, novo mave ripura kutja oweṱe mbu tu ri motjiṋa tjokumuzengisa!”