Fairy tale by Adelheid Veii-Mbuaondjou as recorded for the Dammann Collection on 28 April 1954 (28 Kozonyanga 1954)

Ape hara, omurumendu otja kupa omukazendu nave kara nokanatje okatiti kena Tiotio. Ovo otji va kara nao nu eyuva rimwe ina aka tjora ozongune nu ngunda ama tjora a niniwa i yOtjikumbamba. Ihe a paha, a paha e he mu munu, posi eye ookuteza ondambo a munu kutja ‘omukazendu wandje nangwari wa niniwa i yOtjikumbamba.’

Eye ookuyaruka konganda a kaeta okanatje, nu rondisa okanatje komuti posi yondjira Otjik- umbamba pu tji kapitira. Eye tjandje we ripangina nomauta, nomakuva nomanga ombya tara na vyo kehi yomuti. Ape ya ombungu nu ai pura, “ Tiotio iho wa ya pi?.” Okanatje ake imbura, “Taate wa kapaha oumbwindja nouheoheo mee ku zepa nawo omundu ngwa zepa Mama Karangere Kovitjuma!.” Ombungu ai kapita.

Ape ya ongeyama nai pura, “Tiotio iho wa ya pi?.” Tiotio a imbura,“Taate wa kapaha oumbwindjambwindja nouheoheo mee ku zepa nawo omundu ngwa zepa Mama Karangere Kovitjuma!.” Ongeyama ai kapita. Ape ya omenye nai pura, “Tiotio iho wa ya pi?.” “Taate wa kapaha oumbwindjambwindja nouheoheo mee ku zepa nawo omundu ngwa zepa Mama Karangere Kovitjuma!.” Omenye ai kapita.

Ihe a tja vi Otjikumbamba tji tje ya tjandje ami omuni me tjiwa nu ngarire tji wa raere nao ami mbi zepe. Omuatje a tja osemba. Ape ya okavandje. “Tiotio iho wa ya pi…Hwaahwaa iho wa ya pi?.” “Taate wa kapaha oumbwindjambwindja nouheoheo mee ku zepa nawo omundu ngwa zepa Mama Karangere Kovitjuma!.” Ombandje ai kapita.

Okuza mbo Otjikumbamba kaokuya re atji tja, “Tiotio iho wa ya pi?” nombosiro osirite yomasa. “Tiotio iho wa ya pi!?.” “Taate wa kapaha oumbwindjambwindja nouheoheo mee ku zepa nawo omundu ngwa zepa Mama Karangere Kovitjuma!.” Ihe arire tja yaha Otjikumbamba motjinyo. Otjikumbamba kaokuko re tjandje tja yahwa motjinyo, tja kavetwa komutima. Tji tja koka ihe ookupita, ookupurura, a pitisa ingwi omukazendu. Tjandje ingo omukazendu ngunda u nomuinyo nai keya koka. Ovo ookuyaruka kon- ganda, ave tupuka, ave kakara pehi.

Atji yanda, atji yanda mba. Opuwo